حلويات

وصفه مصوره ماكرون الشوكولاته الفرنسي

  • وقت الطبخ: 0 دقيقة
  • نوع الوصفة :سهلة جدا

المقادير:

بياض بيضكوب سكر بودرةربع كوب سكر ابيض ناعم الحبيباتكوب لوز مطحونربع كوب كاكاو بودرةالحشوة:كوب و ربع شوكولاته شبه محلاة من هيرشيربع كوب كريمة الخفق

طريقة التحضير :

أول شي راح ننخل السكر البودرة و اللوز لحال اذا كان فيه تكتلات نشغل عليه خلاط الكيك لأقل درجة لمدة دقيقة عشان تفك معانا
و لما ننخل خصوصا في اللوز راح تلاحظون مو كله راح ينزل من المنخل فيه جزء منه مو مطحون كامل يصير نرجع مرا ثانية نحط زيادة وننخل
ونقيس اللوز اذا ماوصل لكوب ارجعوا انخلوا زيادة لحد يصير كوب بالتماام
و الكاكاو ينخل بعد
و بعد مانخلنا اللوز و السكر البودرة و الكاكاو لحالهم
نرجع ننخلهم مع بعض بس نصيحة مو كل الكمية تنخلونها راح تتناثر انخلوا على دفعتين لحد ماتصير مثل حبيبات الرمل بهذا الشكل
نخليه على جنب و نسوي الميرانغ
و اللي راح نستخدمه الميرانغ الفرنسي مايحتاج نسوي سيرب
طبعا مثل مانبهت لازم يكون البيض بدرجة حرارة الغرفة و نكون دقيقين لما نفصل الصفار عن البياض
لأن لو البياض فيه نقطه من الصفار راح يطلعلنا الميرانغ مثل كذا لو نخفقه يوم كامل مافي فايدة
عشان كذا اغلب الأخطاء اللي تصير الماكرون يصير سائل بسبب عدم جمود الميرانغ 
بعد مافصلنا البياض نبدا نخفق فيه لو كان باليد بحركة سريعة لحد مانوصل لهذي النفشة
 
ونحط السكر الأبيض ناعم الحبيبات و نرجع نخفق لحد مايصير الميرانغ فيه لمعة و قوامه تماسك و زاد نفشته شوي واذا قلبناه ماراح يطيح من القالب
يصير كذا الميرانغ جاهز 
ناخذ جزء منه ونحطه على خليط اللوز و السكر و الكاكاو 
ونقلب من فوق لتحت بحركه خفيفة دائرية 
راح تلاحظون كور من الميرانغ و اللوز ماعليه استمروا مافيه مشاكل
وبعدين ضيفوا الباقي من الميرانغ و قلبوا على نفس الحركة  تقريبا 45 قلبه 
كل ماقلبتوا كل ماطلع الماكرونز افضل
وراح يطلع بالنهاية خليط مثل كذا
 صبوه بكيس كريمة الكيك
و تكونون مجهزين صينية الخبْز اللي هي حقت الكوكيز
و حاطين طبقتين من ورق الزبدة و لزقوها على الأطراف ممكن بأي مادة دهنية او نفس خليط الماكرون
عشان تحافظون على شكل الدوائر امسكوا الخليط مستقيم مو مايل بهذا الشكل
و السبب راح يطلع جزء منتفع و جزء لا القشرة ماراح تصير مستقيمة
و عشان تصير مقاس واحد وانتوا تصبون عدوا 1 2 3 4 5
بضغطه خفيفه مو قوية راح تطلع تقريبا تشبه بعض
و تخلون مسافة تقريبا 3 سم بين كل دائرة
وبعد ماتخلصون من كل الدوائر اضربوا الصينية على سطح صلب  كذا ضربة حتى يتساوى سطح الدوائر
 واذا فيه مثل الندبات من فوق بللوا اصابعكم بشوي مويه و ساووها 
وممكن تعملون هذا الشكل بقطر 8 سم 
 و حطوها تحت مكيف الهوا مسلط عليها لمدة 35 ل 45 دقيقة
لحد ماتنشف القشرة تماااااام وهذا سر نجاحها
واذا كنتوا في منطقة باردة راح تحتاج لساعة 
قبل ماندخل الماكرون للفرن ببربع ساعة نشغل الفرن على درجة حرارة 150 درجة او 300 فهرنهايت
واذا دخلنا الماكرون خفضنا ل 120 او 110 درجة او 250 فهرنهايت
و راح تظل في الفرن من 10 دقايق ل 20 دقيقة بالكثيررر
ويختلف من فرن لفرن ونشرف من تحت اذا جمد او لا 
ونطلعه من الفرن ونتركه يبرد ساعة ونص و مانمسك القشرة من فوق ابدا ابدا لحد ماتبرد لأن رقيقة وممكن تتكسر
وعشان نفصل الماكرون عن ورق الزبدة نبلل سطح نظيف بموية دافية ونشيل ورق الزبدة ونحطه عليه لمدة دقيقتين وراح تفصل معانا
 
وايضا من نجاحها تكون القاعدة نظيفه  مسطحة مافيها فراغات
وكذا يكون خلص الماكرونز السهل 🙂
الحشوة 
الحشوة هنا من اسهل الحشوات بس اهم نقطة انه لازم تكون الشكولاته مفتته حتى لو كانت هيرشي
نفتتها  بالسكين حتى يسهل ذوبانها
ونسخن كريمة الخفق حتى تطلع فقاقيع بسرعة نصبها على الشوكولاته و نقلب فيها وندخلها الثلاجة لمدة 10 دقايق تبرد
و نحشي الماكرون وفيها
ملاحظة:
اذا كان عمل الماكرون لمناسبة يفضل عمل الدوائر قبلها بكم يوم  بسبب انه ياخذ وقت في المطبخ و تحطونها داخل علبه بحذر  و تتقفل مرا كويس عشان لا تنشف وتصير مثل الصخر
و الحشوة تسوونها في يوم مناسبتكم و السبب انها تنشف لو سويتوها قبلها كم يوم

تعليق واحد

اترك تعليقاً